01invitatie
02bruiloft
03roodstrikje
04mannenkoor
05champagne
06boerenkiel
07carnavalsstrikje
08begrafenis
09oud-prinsen
10schouders
11schoenen
12rook

’t Thema van dees mónd is de smoking. In dizzen tied van Kerstmis, âld en neej en de Carneval ien ’t vöruutzicht ziede um dukker as ien de zòmmer. Hoe de smoking dor zelf ovver denkt beschreef Theo Cremers hierônder. De beejbehurende foto’s zien gemakt dör Flohr Vloet. Ge kunt ok luustere en tegeliektied mitlaeze. Klikt dorvör op ònderstónd driehuukske.

Ik bin mar ‘ne smoking

Mar iëne kier bin ik gebruukt worvör ik feitelek geschape bin. ’t Was òp ’n brulleft mit allemól kaûwe kak. Ien de uutnoëdiging, in dit geval ‘invitatie’ genoemd, stônd as dresscode ‘Black Tie’. Alle kels hán zich án dit vörschrift gehâlde en zage d’r uut asof ze allemól ien ’t zelfde mannekoër zònge. De dames bewoge zich beej dees gelegenheid vort ien de maest vremde creaties mit duk ‘ne diêpe, aoit te ver opevallende split en dito decolleté, wor dan wer de oëge van ’t hiële mannekoer achterán ròlde. Ok de obers droêge Black Tie. Wellicht hán die ok ’n ‘invitatie’ gehad. ’t Was vör de gaste lâstig um d’r âchter te kòmme beej wie ze ’n drankje kòsse bestelle.

Nië, gef meej dan mar ’t Carnevalsfaest, dorvör bin ik ángeschaft. Dan is ’t wer mekkelek. Tusse alle boere- en ânder kiele, tele- en ânder tubbies zuûk ik dan nor kels van middelbare laeftied of (wied) dorbaove in ‘Black Tie’: de Âld Prinse.

Ze ònderscheije zich van de vader Abrahams ònder de Carnevalsvierders dör ’n uniform strikske worvan de linkse vleugel gael en de rechtse gruûn is, gescheije dör ‘ne roëie knöp. D’r is d’r iëne beej - det is ’n apart geval - die het ’t gruûn links. ’t Is genne Werts, dizze kier.

Aerg genoeg bin ik duk, te duk, uut de kâst geháld vör ’n begreffenis. Âld Prinse zien net gewoën minse en gón ok doëd. De Âld Prinse is ’n hecht clubke, dus beej ’n begreffenis van iën van hun, zien ze d’r allemól ien vol ornaat beej. De treurnis vuul ik dan mit miene Âld Prins mit. Umdet heej niks anders doên kan beej zó’n droevige gelegenheid, wor ik extra verzörgd. Gen pluûske, gen roës hangt d’r òp mien schouwers. Mien bòksepiêpe, strak ien de ploi, hange ovver schoên die dan wél gepoetst zien. Ok afscheidneme huurt beej ’t laeve van ‘ne smoking.

Volges Wikipedia bin ik aovendkleding vör feesteleke gelegenhede. D’n Dikke het ’t ovver herenkostuum mit korte jas mit lange en briëje revers. Stijlgids ’t Blauwe Boekje zet det ik van oërspròng gedrage wier beej ’t roëke nó ’t diner. Det dun ze ien bepálde kringe um de ânder klier nie mit roëklucht te laote dörtrekke. 

Ik vien ’t allemól baest, as ik meej mar nie te veul tussen de kaûwe kak hoef te begaeve.

De groete

Smoking



Webdesign COMMARTS